Шығыс Қазақстандағы ауыл шаруашылығына қолайлы өңірлердің бірі – Самар ауданы. Жері құнарлы, климаты жұмсақ бұл аймақ дәстүрлі түрде дәнді, мал азығы және бау-бақша дақылдарын өсірумен айналысады. Алайда соңғы жылдары жауын-шашын мөлшерінің азаюы мен су көздерінің тартылуы аграрлық секторды қиын жағдайда қалдырып отыр. Осы орайда өңірде ауыл шаруашылығын тұрақты дамыту үшін су инфрақұрылымын қалпына келтіру жұмыстары қолға алынуда, деп хабарлайды Altainews.kz тілшісі.

Аудан аумағындағы Лайлы, Қамысты, Карповка және Ешкібай тоғандары кезінде ауыл шаруашылығын суландырудың басты көзі болған. Жергілікті шаруашылықтар бұл тоғандар арқылы жүздеген гектар егіс алқаптарын суарып келген. Алайда уақыт өте келе нысандар тозып, толыққанды жұмыс істеу мүмкіндігінен айырылған.

Мәселен, қазіргі таңда Ешкібай тоғанының техникалық мүмкіндіктері шектеулі болғандықтан, тек 500 гектар алқапты ғана қамти алады. Ал күрделі жөндеуден кейін бұл көрсеткіш 1300 гектарға дейін ұлғаймақ. Бұл – аграрлық өнім көлемін арттырып, жергілікті шаруалардың кірісін көбейтуге нақты негіз.

Айта кетейік, бұл бастама “Жер аманаты” және “Ауыл аманаты” сынды мемлекеттік бағдарламалардың басым бағыттарымен де үндесіп отыр. Су инфрақұрылымын жаңғырту арқылы тек аграрлық сектор ғана емес, ауылдық жерлердегі еңбек өнімділігі мен кәсіпкерліктің де дамуына серпін берілмек.

Фото: Руслан Акматалиев