Салық төлеуші кепілге қойған мүлікті немесе салық берешегін өтеу үшін иелігі шектелген мүлікті сату 2018 жылғы 1 ақпандағы №111 ережелерге сәйкес жүргізіледі, деп хабарлайды Altainews.kz тілшісі.

Борышкердің шектеулі мүлкін сату серіктес компания веб-порталында электрондық аукцион арқылы өтеді. Қатысу үшін жеке немесе заңды тұлға:

• хабарламада көрсетілген ұйымдастырушының банк шотына кепілдік жарна аударады;

• тізілім веб-порталында тіркеледі;

• электрондық өтінім береді.

Аукцион сейсенбі мен жұма аралығында, мереке және демалыс күндерінен басқа уақытта, Астана уақытымен 10:00–17:00 аралығында өтеді. Сағат 15:00-ке дейін басталуы тиіс. Қатысушылар аукцион басталғанға дейін бір сағат ішінде ЭЦҚ арқылы тіркеледі.

Аукцион хабарламада көрсетілген уақытта автоматты түрде басталады. Егер белгілі бір лотқа екіден аз қатысушы тіркелсе, ол лот бойынша аукцион өтпеді деп танылады.

Нәтижелер хаттамамен рәсімделеді, онда жеңімпаздың және борышкердің (немесе оның атынан уәкілетті өкілдің) шартқа қол қою міндеттемелері көрсетіледі. Жеңімпаз сатып алу-сату шартына он жұмыс күнінен кешіктірмей, төлем жасалғаннан кейін қол қояды.

Хаттама негізінде:

• компания мемлекеттік бюджетке қаражат аудару деректерін электронды мекенжайға жібереді;

• борышкерге шарт жасасу қажеттілігі туралы хабарлама жолдайды.

Егер борышкер шартқа қол қоюдан бас тартса немесе 5 жұмыс күні ішінде келмесе, шартқа оның атынан өкіл қол қояды.

Сату бағасынан шығындар мен сыйақы ұсталады, қалған қаражат борышкердің мемлекеттік бюджет алдындағы қарызын өтеуге бағытталады. Қалған сома бюджетке ақша аударылғаннан кейін үш жұмыс күні ішінде борышкердің есепшотына қайтарылады.