Бүгінде техникалық мамандықтарға сұраныс артқан тұста, темір-терсекті еркін меңгерген білікті шеберлердің орны айрықша. Олар ­ ел экономикасының тынысы мен өндірістің тірегі. Токарь мамандығы қазақ үші таңсық емес. Кезінде ата-бабаларымыз темірден түйін түйген нағыз ұста болған. Солардың бірі «Өскемен Водоканал» кәсіпорында ұзақ жылдардан бері қызмет етіп келе жатқан токарь Самат Ғайсин. Шаһардың сумен үздіксіз қамтамасыз етілуіне жауапты маман су құбырында апат болған сәттерде күн-түн демей жұмыс орнынан табылады, деп хабарлайды Altainews.kz тілшісі.

Зейнеткерлікке шыққанына төрт жылдан асқанымен,  ардагер токарь еңбектен қол үзбей келеді. Шығыс Қазақстан облысының Ұлан ауданында туып өсті. Темірдің тілі мен сырын жастайынан таныған Самат Ғайсин Одесса қаласындағы арнаулы оқу орнына түсіп, темір өңдеу ісін жетік меңгеріп шығады.

Шебердің сөзіне қарағанда, әрбір темірдің бойында бір сыр, әрбір бөлшекте бір міндет бар. Жөнделген тетік – жүйелі жұмыстың кепілі. Оның қолына түскен бөлшектерге жан бітіп, жүрмей тұрған машина болсын, басқа құрылғы болсын, зырылдай жөнеледі.

Өткен жылы қаладағы бір шағын ауданның кәріз құбыры істен шығып, бүкіл ауданды дәретханадан аққан жаман су басып кету қаупі төнеді. Сантехник мамандардың айтуынша, бір жерде «задвижка» жабылмай тұр. Самат
Ғайсинді дереу жұмысқа шақыртады. Самат аға үш сағатта әлгі задвижкаға қажетті бөлшекті жонып, жасап шығады.

Шебердің серігі – Солтүстік Кореядан шыққан  Кусон-3 деген өте ескі станок. Осыдан он екі жыл бұрын келгенде де осындай ескі болыпты.

Кейіпкеріміз өзінің біліктілігін арттыру үшін ғаламторды ақтарып, ютуб арнасындағы бейнежазбаларды қарайды. Бірақ оның негізгі сүйенері – өзінің ішкі түйсігі мен туа біткен таланты. Талай жолдастары  мен таныстары көліктеріне қажетті бөлшекті не бір тетікті таба алмай қиналғанда  Самат ағаға үміт артып келеді. Өйткені ол кісі кез келген «детальды» зауыттан шыққандай жасап бере алады.

Қазір ол станогында ауладағы қарды тазалайтын шағын трактор құрастырып жатыр. Оған дейін бетон араластыратын құрылғы жасап шыққан. Шығармашылық пен рационализаторлық – оның сүйікті ісі.

Кәсіпорында қазір бар болғаны  төрт токарь маман жұмыс істейді. Олардың екеуі зейнет жасында, тағы  біреуі зейнеткерлікке таяп қалған, ең жасы – елу алты жаста. Кадр жетіспеушілігін кейіпкеріміз еңбекақының төмендігінен деп санайды.

Өткен жылы тәжірибеден өту үшін бір жас бала келіпті. Самат аға үш ай бойы білген-түйгенін шәкіртіне үйретіп, әбден шыңдайды. Өзі де жұмыссыз отыруды жаны сүймейтін маман оқушысын да жұмсай беріпті.

Тоқсан бес жасқа дейін жұмыс істей берем

Самат аға бос уақытын денсаулықты күтуге арнайды. Алпыстың жетеуіне келген зейнеткер өзін қырық-қырық бес жас шамасында сезінетінін айтады. Күнделікті таңертең жаттығу жасайды, 500 рет отырып-тұрады, жерден кеудесін 250 рет көтере алады, турникке тартылады. Ол кісі жуықта ютубтан өз арнасын ашыпты. Онда токарьлық туралы емес, салауатты өмір салтын насихаттайтын бейнежазбалар жүктелген.

Самат ағаның алға қойған үлкен мақсаты бар.

Кәсіпорында кадр тапшылығы өткір сезілуде

«Өскемен Водоканал» кәсіпорнында  штат бойынша 940 қызметкер жұмыс істеуге  тиіс. Алайда, 2025 жылғы шілде айындағы жағдай бойынша нақты жұмыс істеп жатқан қызметкерлер саны – 677 адам. Осылайша, кәсіпорында 263 бос орын бар.

Кәсіпорынның ресми сайтындағы мәліметтерге сүйенсек, кадр жетіспеушілігінің негізгі себебі – жалақы деңгейінің төмендігі. Бұл жағдай қызметкерлердің жұмысқа орналасуға қызығушылығын төмендетіп отыр. Осыған қарамастан, кәсіпорын кадр мәселесін шешу бағытында тұрақты жұмыс жүргізуде: халықты жұмыспен қамту орталығына өтінімдер жолданып, бос жұмыс орындары туралы ақпарат кәсіпорынның ресми сайтында және Instagram парақшасында (@presssec.vodokanal.ukg) жарияланып отырады.

2024 жылдың қазан айынан бастап 2025 жылдың маусымына дейінгі аралықта 152 қызметкер жұмыстан шығарылса, есепті кезеңде 178 жаңа қызметкер жұмысқа қабылданыпты.

Кәсіпорында кәсіби дайындықты жетілдіру бағытында да жұмыс атқарылуда.  Мысалы, 113 қызметкер – электр қауіпсіздігі бойынша аттестаттаудан өтті, 552 қызметкер – өнеркәсіптік қауіпсіздік бойынша оқу оқып келсе, 8 қызметкер – бейіні бойынша түрлі семинарларға қатысып, біліктілігін арттырған.