Ел экономикасының негізі өндіріс саласында жатқаны белгілі. Өндірістің түрлі салаларында еңбек етіп, экономикаға үлес қосқан азаматтардың маңызы ерекше. Солардың бірі – Дидар Қуанышұлы Тулепханов. Ол – «Казцинк Шахтострой» компаниясында еңбек етіп келе жатқан тау-кен маманы. Өзінің қажырлы еңбегі мен кәсіби шеберлігі арқасында ол шахта жұмыстарының қауіпсіздігі мен тиімділігін қамтамасыз етіп, өз ісінің нағыз маманы екенін дәлелдеп жүр.

Мемлекет басшысы Қасым-Жомарт Тоқаев «2025 жыл – Жұмысшы мамандықтары жылы» деп жариялады. Президент өз сөзінде техникалық және кәсіби білім беру жүйесін реформалау қажет екенін айтты. Сондай-ақ жұмысшы мамандықтары мәртебесін асқақтатып, нағыз маман болу идеясын насихаттауымыз жөн деді. Мемлекет басшысының бұл бағдарын Шығыс өңірінің халқы қолдайды.

Дидар Қуанышұлы бірнеше жылдан бері бекіткіш маманы болып қызмет атқарып келеді. Оның негізгі міндеті – тау-кен қазбаларын нығайту және шахта қызметкерлерінің қауіпсіздігін қамтамасыз ету. Бұл міндеттерді орындау үшін ерекше жауапкершілік пен жоғары кәсіби біліктілік қажет. Тау-кен өндірісінде, әсіресе шахтада жұмыс істегенде қауіпсіздік бірінші орында тұрады. Өндіріс саласында ең маңызды мәселе – адамдардың өмірі мен денсаулығы. Күн сайын жұмыс барысында қолданылатын материалдардың тиімділігі, уақыт қысымында қабылданған шешімдердің дұрыс болуы мен талаптарға сәйкестігі осы маманның жұмысының негізгі аспектілері болып табылады. Ол әрқашан жұмысын жоғары деңгейде атқарып, ең маңыздысы – әріптестерінің өмірін сақтауға бағытталған іс-әрекеттерді жүзеге асырады.

Жас маманның еңбек жолы көптеген мамандарға үлгі боларлықтай. Ол тек өз жұмысына жауапты емес, сондай-ақ өзінің тәжірибесімен бөлісіп, жаңадан жұмысқа орналасқан әріптестеріне кәсіби дағдыларды үйретіп келеді.