«Еңбек жолы» республикалық конкурсының өңірлік кезеңінде «Жұмыс істейтін жастардың үздік тәлімгері» номинациясы бойынша 20 маман жеңімпаз атанды. Олар өздерінің еңбек жолында 1253 жас маманға тәлімгерлік жасап, түрлі салада білімдері мен тәжірибелерін табыстады, деп хабарлайды Altainews.kz тілшісі.

Ең көп шәкірт тәрбиелеген тәлімгер – Алматы қаласынан Алшын Алтыбаев. Ол ауыл шаруашылығын механикаландыру және цифрлық трансформациялау саласында 50 жыл бойы еңбек етіп, 500-ден астам қызметкерді оқытқан. Қостанай облысынан Ришат Фастхутдинов пен Қызылорда облысынан Гүлсім Дарибаева 100-ден астам маманға білім берген.

Тау-кен және металлургия саласында Абай облысынан Нұрлан Байбутинов, Ақтөбе облысынан Айдын Қайырбеков және Қарағанды облысынан Ерлан Сыздықов 73 жаңа маманды дайындады. Білім беру саласында Алматы облысының Жанат Керімбаевы, Жамбыл облысының Ұлмекен Ибраевасы және Жетісу облысының Раушан Зайтбекова 98 маманға бағыт-бағдар көрсетті.

Телекоммуникация саласында Батыс Қазақстан облысынан Қоблан Метекесов пен Ұлытау облысынан Дулат Құрманбеков 32 қызметкерді оқытса, өнеркәсіп саласында Павлодар облысының Жексен Ажмановы, Солтүстік Қазақстан облысының Асылтас Қабошевасы және Шымкент қаласының Александр Черныхы 70 маманға тәжірибе берген.

Энергетика саласында Шығыс Қазақстан облысынан Андрей Лисицын мен Астанадан Дисембай Шайкенов 55 маманды оқытты. Ал HR саласында Ақмола облысынан Несібелді Жүсіпова, Маңғыстаудан Алексей Савин және Атыраудан Мейрамгүл Жолаева 104 жас маманға бағыт көрсетті.

Айта кетейік, «Еңбек жолы» байқауы жастар арасында жұмысшы кәсіптерін насихаттауға және еңбек әулеттерінің дәстүрлерін сақтауға бағытталған. Биыл конкурсқа 505 өтінім түсіп, өңірлік кезеңде үш номинация бойынша 60 жеңімпаз анықталды. Енді олар республикалық кезеңде өз өңірлерінің намысын қорғайды.

Жеңімпаздарды марапаттау салтанаты Жұмысшы кәсіптер жылының жабылуына арналған іс-шара аясында желтоқсан айында өтеді.