2024 жылы Ұлттық банк бизнесті несиелендіру үшін БЖЗҚ зейнетақы қорларын банк облигацияларына 500 миллиард теңгеге дейін инвестициялауды жоспарлап отыр, деп хабарлайды Altainews.kz тілшісі.

Бұл ақпарат ҚР Ұлттық банкінің зейнетақы активтерін басқаруға қатысты сәуірдегі презентациясында берілген.

Банктерге мынадай талаптар қойылады:

Екінші деңгейлі банктің ең төменгі кредиттік рейтингі «В» төмен емес;

Екінші деңгейлі банктің меншікті капиталының мөлшері кемінде 60 млрд теңге;

өтеу мерзімі 7 жылдан аспайтын нарықтық табыстылықпен облигациялар шығару арқылы бизнесті несиелеу.

Көтерме және бөлшек сауданы, тұрғын үй құрылысын, тұрғын үй және коммерциялық жылжымайтын мүлікпен мәмілелерді, жеке тұлғаларды несиелеуді, қаржылық қызметті, кеңес беру қызметін, сауда орталықтарының қызметін кредиттеуге жол берілмейді. 

Сондай-ақ, айналым қаражатын толықтыру және қолданыстағы несиелерді қайта қаржыландыру мақсатында несиелеуге жол берілмейтіні түсіндірілді.

Сонымен қатар, тұсаукесерде Ұлттық банк 2024-2025 жылдары «Бәйтерек» және «Самұрық-Қазына» холдингтерінің облигацияларына, сондай-ақ түрлі жобаларды несиелендіру мақсатында 1,5 триллион теңгеге дейін зейнетақы активтерін инвестициялауды жоспарлап отырғаны айтылған.

Негізгі талаптардың бірі – экономиканың әртараптандырылуы мен өсуін, импортты алмастыруды және жергілікті қамту үлесін арттыруды қамтамасыз ететін жобаларды қаржыландыру.