Алтай қаласындағы №9 орта мектеп «Қазақстан халқына» қорының қолдауымен жаңа мүмкіндіктерге ие болды. Мектепте робототехника кабинеттері, телестудия, арт-студия және шығармашылық шеберханалар ашылып, оқушылардың дамуына жағдай жасалды. Бұл кабинеттер мен зертханалар оқушылардың өз идеяларын жүзеге асырып, шығармашылық қабілеттерін дамытып, эмоциялық демалыс алуына мүмкіндік береді,- деп хабарлайды Altainews.kz тілшісі.

Алтай ауданының әкімі Ренат Құрмамбаев мектепке арнайы барып, оқу орнының жаңашылдықтарын көріп қайтты. Әкім мектеп ұжымымен кездесіп, жаңа зертханалар мен кабинеттердің оқушыларға тигізетін пайдасын атап өтті.

Сонымен қатар мектепте акт және спорт залдары мен кітапханаға жаңа жиһаздар мен құрал-жабдықтар орнатылды. Көрнекі оқу құралдары, шығармашылық бұйымдар және оқу-әдістемелік құралдар оқыту сапасын жақсартуға бағытталған. Мектеп директоры Назигүл Шоматова бұл жаңашылдықтарына тоқталды. 

Заманауи технологиялар мен құрал-жабдықтар оқушылардың сапалы білім алып, үлкен жетістіктерге жетуіне мүмкіндік берері сөзсіз. Бұл қолдау мен жаңғыртулар мектептің болашақтағы табыстарының негізі болмақ.

Фото: Алтай ауданы әкімдігі