Серебрянскіде көпбалалы аналар баспаналы болды – ШҚО
Жаңа жыл қарсаңында Серебрянскіде бес көпбалалы отбасы «Бір қабатты Шығыс» бағдарламасы аясында салынған жаңа үйлердің кілтін алды, деп хабарлайды Altainews.kz тілшісі.
Аудан әкімі Ренат Құрмамбаев Серебрянскідегі бес көпбалалы анаға «Бір қабатты Шығыс» бағдарламасы бойынша салынған жаңа үйлердің кілттерін табыстады. Аталған үйлерді мердігер ұйым – «Проект» құрылыс компаниясы салған.
Көпбалалы аналар мен қоғам өкілдері үйлерді қарап, олардың сапасына риза болды. Аудан әкімі, мәслихат төрайымы Л. Гречушникова, ақсақалдар кеңесінің төрағасы К. Садықов және ақсақалдар кеңесінің мүшесі Г. Яковенко көпбалалы аналарды жаңа қоныстарымен құттықтап, баршасына денсаулық пен амандық тіледі.
Өз кезегінде көпбалалы аналар Жаңа жыл қарсаңында осындай сыйлық жасағандарға алғыс айтты.
– Осындай қымбат сыйлық үшін мемлекетімізге алғысымыз шексіз, – деді көпбалалы ана Анна Волкова.
– Бізге осылай құрмет көрсетіліп жатқанына қуаныштымын. Баршаңызға бейбіт аспан мен амандық тілеймін. Балаларымыздың дені сау болып өссін. Осы жетістіктерімізді сақтап, одан әрі дамытуға тырысайық.
– Біздің отбасы, әсіресе балалар, Жаңа жылды жаңа үйде қарсы алатынына өте қуанышты. Біз бәріне разымыз. Президентімізге алғысымыз шексіз, – деді Марина Горбатовская.
