Соңғы кезде Шығыс Қазақстан облысының жас спортшылары әлемдік додаларда сәтті өнер көрсетіп жүр. Бұл жолы каратэшілер кәріқұрлықтан олжалы оралды, деп хабарлайды Altainews.kz тілшісі.

Румынияның Клуж-Напока қаласында 1-9 қыркүйек аралығында киокушинкай-кан каратэден Еуропа чемпионаты өткен болатын. Аталмыш додада шығысқазақстандық төрт спортшы топ жарды. Өңір жұртшылығы жүлдегерлерді Өскемен әуежайында қарсы алып, құрмет көрсетті.

Шығысқазақстандық спортшылар бұл жолы каратэнің ката және кумите түрлері бойынша жеңіске жетті. Нақтырақ айтқанда, Ақерке Болатова 12-13 жас бойынша каратэнің ката түрінен 1 орын алса, кумите сайысында 55 келі салмақ дәрежесінде сынға түсіп, қарсылас шақ келтірмеді. Ал Алдияр Талғатов 12-13 жас бойынша кумите түрінен 1 орынды жеңіп алса, Мәулия Талғат есімді спортшы ката түрінен 3 орынды, кумите түрінен 2 орынды еншілеп қайтты. Сондай-ақ Ақат Сәбитұлы кумите түрі бойынша қола жүлдені қоржынға салып, жауынгерлік рухы үшін жүлдеге ие болған.