ШҚО: Кене энцефалитіне қарсы вакцина кімдерге салынады?
ШҚО санитарлық-эпидемиологиялық бақылау департаментінің мәліметінше, кене энцефалиті медициналық көмектің кепілдік берілген көлемі шеңберінде (яғни тегін негізде) міндетті профилактикалық екпелер жүргізілетін аурулардың тізбесіне енгізілген.
ШҚО аумағына келетін болсақ, мұнда тұрғындар эпидемиологиялық көрсеткіштер бойынша егілетін болады, деп хабарлайды Altaynews тілшісі.
Кене энцефалитіне қарсы вакцинация инфекцияның табиғи ошақтарында тұратын және жұмыс істейтін халыққа жүргізіледі, деп атап өтті СЭБД баспасөз қызметі.
ШҚО-да, санэпидқызмет ақпараты бойынша, кене энцефалитінің табиғи ошақтары Глубокое, Зайсан, Катонқарағай, Ұлан, Шемонаиха, Самар және Алтай ауданының аумақтары, сондай-ақ Риддер мен Өскемен маңы болып табылады. Демек, аталған аудандардың тұрғындары және Риддер мен облыс орталығының маңында тұратындар кене энцефалитіне қарсы егілуі мүмкін.
Вакцинаны тіркелген жері бойынша медициналық мекемеден алуға болады. Вакцинаны қолдануға үш жастан бастап рұқсат етіледі, деді санэпидбақылау департаментінде.
Оқи отырыңыз
