ШҚО-ның Абай ауданында құтқарушылар бес күн бойы өрт сөндіргені туралы жазған едік. Өрт сөндіру жұмыстарының барысында жергілікті тұрғын жанып кете жаздағаны белгілі болды, деп хабарлайды Алтайньюс тілшісі.

ҚР ІІМ ТЖК баспасөз қызметінің ақпараты бойынша, өрт 24 қыркүйекте Қоңыр Әулие қонақүй кешеніне жақын маңда басталған. Таулы жерде қураған шөп өртенген. Өрт сөндіру жұмыстарына облыстық ТЖД-нің барлық күштері мен құралдары, сондай-ақ, Ұлттық ұлан әскери бөлімінен, жергілікті атқарушы органдардан 242 адам және 29 техника жұмылдырылды. Өрт 28 қыркүйекте толықтай сөндірілді. Өрттің жалпы аумағы 2 мың гектарды құрады.

Жұмыс барысында өрт сөндіруге көмектесіп жүрген жергілікті тұрғын жанып кете жаздаған екен. Киіміне шоқ тиіп, жана бастаған. Ұлттық ұлан гвардиясының ефрейторы Руслан Еркебаев оған көмекке келіп, құтқарып қалды.

Алайда зардап шеккен ер адамның жағдайы қазір ауыр екен. Ол Абай аудандық ауруханасында жатыр.