29 мамыр күні сағат 18.00-де «Хабар» арнасының тікелей эфирінде Қазақстан Президенттігіне үміткерлердің дебаты өтеді, деп хабарлайды Алтайньюс тілшісі.

Пікірталас үш раундтан тұрады. Бірінші раундтың тақырыбы – «Қазақстанның экономикалық дамуының басым тұстары». Арнаның ақпаратына сүйенсек, аталмыш раунд екі турдан тұрады. Бірінші турда әрбір кандидат өзінің сайлау алдындағы бағдарламасын ұсынуы тиіс. Екінші турда қатысушылар қарсыластарға екі сұрақ қойып және екі сұраққа жауап береді.

Екінші раундтың тақырыбы – «Қазақстанның әлеуметтік жаңғыруы». Бірінші турда Президент лауазымына үміткерлер берілген тақырып бойынша сөйлейді, ал екінші турда жүргізушінің бір сұрағына жауап беруі керек.

Үшінші раундтың тақырыбы – «Сайлаушыларға сөз». Үміткерлер Қазақстан халқына жүгінеді.

Дебаттардың түсірілімі «Қазмедиа орталығы» медиакешенінде өтеді. Пікірталасты тележүргізушілер Ерлан Игисинов пен Қымбат Досжан жүргізеді.