ШҚО-да екі ай ішінде 11 адам қызылша дертіне шалдықты, деп хабарлайды Алтайньюс тілшісі.

Қызылша белгілері Аягөз, Тарбағатай, Шемонаиха аудандары мен Семей қаласының тұрғындарынан анықталып отыр. Бұл туралы ШҚО Қоғамдық денсаулық сақтау департаменті мәлімдеді.

Он бір адамның төртеуі егілді. Дәрігерлердің пікірінше, аурудың таралуы халықтың көші-қонымен байланысты. Яғни тұрғындар инфекцияны басқа өңірлерден әкелген болуы мүмкін.

Қазіргі уақытта барлық пациенттер емдеуден өтіп, стационардан шықты.

Еске сала кетейік, оқушылар, студенттер немесе қызметкерлер арасында қызылша белгілері анықталған жағдайда, карантин жарияланбайды. Алайда дәрігерлер 21 күн бойы ұжымды бақылап отырады.