Риддер қаласының жылу-энергия орталығын жаңғырту жұмыстары толық аяқталды, қазандықтар қалыпты жұмыс істеп тұр, үйлерге жылу берілуде.

Бұл туралы Шығыс Қазақстан облысының 2023 жылдың 10 айындағы әлеуметтік-экономикалық дамуы туралы Президент жанындағы Орталық коммуникациялар қызметінде өткен баспасөз конференциясында аймақ басышысы Ермек Көшербаев мәлім етті, деп хабарлайды Altaynews.kz тілшісі.

Естеріңізге салар болсақ, Риддер ЖЭО-ны жөндеуге Үкімет қаржы берген болатын. Сонымен қатар облыстық бюджеттен де қаражат бөлінді. Осының арқасында негізгі қондырғылар жөнделіп, жаңғыртылды. 
Бүгінгі таңда барлық 6 қазандық агрегатын және қажетті инфрақұрылымды жөндеу жұмыстары аяқталып отыр. Қаланы жылумен жабдықтау температуралық кестеге сәйкес жүзеге асуда. Қазір 1 жоғары қысымды және 2 орташа қысымды қазандық жұмыс істеп тұр. 3 қазандық – резервте. 15 желтоқсанға дейін іске қосу-реттеу жұмыстары толық аяқталуға тиіс.
Қазан айында ЖЭО Риддер қаласының коммуналдық меншігіне қабылданды. Станция отынның қажетті қорымен қамтамасыз етілген.