Алтай ауданында Жұмысшы мамандықтары жылының ашылуына арналған форум ұйымдастырылды. Форумның басты тақырыбы – ұрпақтар сабақтастығы. Іс-шараға еңбек ардагерлері, жастар және ауданның кәсіпорындары мен ұйымдарының өкілдері қатысты.

Мемлекет басшысы Қасым-Жомарт Тоқаев 2025 жылды Жұмысшы мамандықтар жылы деп жариялап, адал еңбегімен жетістікке жеткен жандардың қоғамда ерекше құрметке лайық екенін атап өткен болатын. Форум барысында жұмысшы мамандықтарының маңыздылығы мен олардың ел экономикасындағы рөлі туралы сөз қозғалды.

Сонымен қатар, мемлекет тарапынан кәсіби білім беру мен еңбек нарығында сұранысқа ие мамандарды даярлауға ерекше көңіл бөлініп жатқаны айтылды. Алтай ауданының еңбек ардагерлері жастарға үлгі болып, адал еңбектің маңыздылығын көрсетті.

Ел дамуына үлкен үлес қосқан еңбеккерлердің еңбегі атап өтіліп, жас ұрпақтың олардың жолын лайықты жалғастырып келе жатқаны айтылды. Форумда жастардың еңбек дәстүрлерін цифрлық технологиялармен ұштастырып, қоғам игілігіне жұмыс істеп жатқаны да ерекше атап өтілді.