Қайғылы жол-көлік оқиғасы Северное ауылының маңында болды. «Лада Гранта» мен «Mersedes Sprinter» 8 қаңтар күні сағат 16:20 шамасында «Өскемен-Рахман қайнары» автожолының 44 шақырымында соқтығысқан, деп хабарлайды Altaynews.kz тілшісі.

Облыстық Полиция департаменті баспасөз қызметінің ақпараты бойынша, апат салдарынан бірнеше адам жарақат алып,  ауруханаға жатқызылды. «Гранта» жолаушысы оқиға орнында қайтыс болды.

«Абайсызда адам өліміне әкеп соқтырған көлік құралын басқаратын адамдардың жол қозғалысы немесе көлік құралдарын пайдалану ережелерін бұзу фактісі бойынша ҚР ҚК 345 - бабы 3-бөлігі бойынша сотқа дейінгі тергеп-тексеру басталды», - деп хабарлады ШҚО ПД баспасөз қызметі.

Оқиғаның барлық мән-жайын анықтау үшін тиісті сараптамалар тағайындалды.

Полиция департаменті жол қозғалысына қатысушыларды жол ережелерін қатаң сақтауға және ауа райы жағдайын ескеруге шақырады.