Облыс орталығындағы Республика алаңында Наурыз тойы жалғасып жатыр. Өскемендіктер жұлдыздар шеруін күтуде, деп хабарлайды Altainews.kz тілшісі. 

Бұл концерт өңірде бір жұма бұрын, Амал мерекесінде, басталған думанды іс-шара легінің түйіні іспетті. Жергілікті шығармашылық ұжымдар мен жеке орындаушылар сахна төріне кезек-кезек көтеріліп, көрермен көзайымына айналды. 

Шығыстың бас шаһарындағы думанға көршілес Абай облысынан арнайы келген қонақтар да бар. Олар да меркелік іс-шараның деңгейі жоғары екенін атап өтті. 

Өскемендіктер жұлдыздар шеруін күтеді дедік. Бүгін Шығыс өңіріне ат басын бұрған өнерпаздардың қатарында танымал әнші Kalifarnyia бар. Оны көруге, әсіресе, жастар жағы асық екені түсінікті. Сондай-ақ тойшыл қауымды белгілі актриса Нұргүл Мыңғатова құттықтайды. 

Суреттер: Аяужан Утеулинова

Видео: Ермек Иманғазинов