Глубокое кентіндегі су тасқынынан зардап шеккен тұрғындардың бір бөлігі бүгінде мұндағы О.Бөкей атындағы мектепте-интернатта тұрып жатыр.

Білім мекемесінің директоры Сәуле Досқалиеваның айтуынша, қазір интернатта 15 адам тұрып жатыр. Олардың жетеуі - бала.

- Қолдан келген көмектің бәрін беріп жатырмыз. Мектепте зардап шеккендерге қызмет көрсететін медик пен психолог маман жұмыс істеуде. Жер-жерден қайырымдылық көмек те келіп жатыр. Тұрғындар төсек-орынмен, үш уақыт ыстық тамақпен қамтылған. Сол сияқты біздің елді мекенде жұмыс жүргізіп жатқан төтенше жағдайлар қызметінің мамардары да орналасуда, - дейді мектеп-интернат директоры.

Оның айтуынша, білім мекемесінің ұжымы зардап шеккендерге көмектесу жұмыстарына бір адамдай атсалысуда.

Айта кетейік, қазақ тілінде білім беретін аталмыш мектепте қазір 600-ге жуық бала оқып жатыр. Оларға 63 мұғалім дәріс беруде.