Облыс орталығындағы Назарбаев зияткерлік мектебі халықаралық аккредитациядан сәтті өтті! Қуанышты хабар Халықаралық мектептердің кеңесінен білім ошағының директоры Кульфарида Раисованың электронды мекенжайына келген.
Назарбаев зияткерлік мектебінде 23-28 сәуір аралығында CIS - Халықаралық мектептердің кеңесінің халықаралық аккредитация комиссиясы жұмыс істеген болатын. Бұл халықаралық сарапшылардың үшінші сапары еді. Алғаш рет 2015 жылы мектеп ұжымы өздеріне халықаралық мәртебе беруді өтінген кезде келген-ді.
Сарапшылар бұл жолы сабақтарға қатысып, мектеп әкімшілігімен, мұғалімдермен, оқушылар және олардың ата-аналарымен, білім ордасының серіктестерімен әңгімелескен. Қонақтар оқыту жүйесі мен басқару, ерекше қабілетті балалармен жұмыс, мектептегі мәдениет, балалардың денсаулығы мен қауіпсіздігі сияқты мәселелерге аса мән беріпті. Оқу жаттығуы кезінде өрт шыға қалған жағдайда оқушыларды көшіруге дайындық тексерілді.
Шетелдіктер сонымен қатар оқушылардың жыл сайын ұйымдастырылатын ғылыми, әлеуметтік және шығармашылық жобаларының «Open evening» көрмесіне қатысып, су тасқынынан зардап шегушілерге көмек акциясының куәсі болды, «Қоғамға қызмет ету» жобасының шеңберінде ұйымдастырылған «Қайырымдылықты бірге жасаймыз» II облыстық фестиваліне қатысты.
–Оқушылар білім алуға өте ынталы. Бізді олардың білімге деген құштарлықтары қайран қалдырды, – деген пікірін білдірді сарапшылардың жетекшісі Дэвид Джонсон ұжыммен кездесу барысында.
Назарбаев зияткерлік мектебі 2010 жылы ашылған болатын. Осы уақыт аралығында 467 түлек ұшып шықса, олардың ішінде 76 түлек «Алтын белгі» иегері, 24 оқушы үздік аттестатпен бітірген. Олар еліміздің ең үздік жоғары оқу орындарында, 36 бала шетелде: Америка Құрама Штаттарында, Араб Біріккен Әмірлігінде, Венгрия, Корея мен Қытайда, Ресейде білімдерін жалғастыруда. Алғашқы түлектер енді-енді қызметке кіріседі. Мектеп үшін ең тамаша алғыс – университет басшыларынан мектеп ұжымының атына келіп түсіп жатқан ризашылық хаттары екені рас. Қазір білім ордасында 594 оқушы білім алып жүр.
Айна Ескенқызы
