30 тамыз күні Қазақстан Республикасы Коституциясының 20 жылдығы қарсаңында Өскемен қаласында «Ел тірегі – Ата заң» форумы, Бал фестивалі, мерекелік концерт болып өтті. Ата заң мерекесіне арналған шарада орталық алаңға 15 000-ға жуық адам жиналды, деп хабарлайды ШҚО Ақпараттық орталығы.

Шараға қатысушыларды ШҚО әкімі Даниал Ахметов құттықтай отырып, Конституция 20 жылдығын атап өту, ел дамуының жарқын белгісі екендігін атап өтті.

– Осыдан 20 жыл бұрын Ата заңымыз қабылданып, еліміздің мемлекеттік құрылымының іргетасы қаланып, жаңа демократиялық-құқықтық мемлекет құрылды. Бүгінгі күні Қазақстан әлемдік аренада бірқатар жетістіктерге жетті. Елбасымыз Нұрсұлтан Назарбаев ел дамуының стратегиялық жоспарлары көрсетілген «Нұрлы Жол» бағдарламасын жариялап, жаңа даму қарқынына аяқ басты. 5 институционалдық реформаны іске асыруда 100 нақты қадам көрсетілді. Атқарылып жатқан осындай жұмыстар елімізді жаңа қырынан танытып, алдыңғы қатарлы 30 елдің арасынан көрінуге мүмкіндік береді, – деді Даниал Ахметов.

Шараның ресми бөлімінен кейін, отандық эстрада жұлдыздарының қатысуымен концерттік бағдарлама жалғасын тапты.