4-маусым, Қазақстан республикасының рәміздері күнін Өскемен тұрғындары әнұранды орындау рәсімінен бастады. Мемлекеттік әнұранды бұқаралық орындау шарасына 1000-нан астам адам қатысты, деп хабарлайды Аltaynews.kz тілшісі қала әкімінің баспасөз қызметіне сілтеме жасап.

Әскерилер, мемлекеттік қызметкерлер, кәсіпорын жұмысшылары, оқушылар, мұғалімдер, тұрғындардың түрлі категориялары жанарлары жайнап тұрып, қолдарын төсіне қойып, асқан патриоттықпен әнұран орындауы еерекше рух беретіндей.

- Қазақстандай жас мемлекет үшін мемлекеттік рәміздердің маңызы ерекше. Біздің көк байрақ еркіндікті білдірсе, елтаңба - одан күрделірек, себебі ол халықтың бүгіні мен ертеңінен сыр шертіп тұр. Бұл жай ғана символ емес, елдігіміздің нышаны. Ал әнұранды қаншама халық жиналып орындағанда, жұрттың жанарынан ерекше рух байқалды, - дейді Өскеменге рәміздер күні арнайы келген қонақ, елтаңба авторы Жандарбек Мәлібеков. - Мені қасиетті Шығыс жеріне осындай маңызды күні шақырған Өскемен қаласы әкімдігіне алғысымды білдіремін.

Алда басқа да іс-шаралар жоспарланған. Спортшылардың рәміздер тауына шығуы, көк байрағымызды желбіретіп, қалада жүріп өтуі, жастардың «Patriot.kz» акциясы, бәрі-бәрі бүгінгі рәміздер күніне орай ұйымдастырылып отыр.