Мемлекеттік-меншіктік серіктестік аясындағы өзара ынтымақтастық туралы меморандумға сәйкес осы жылы «Қазцинк» әлеуметтік жобалар үшін 3 миллиард теңге қарастырған, оның 1,5 миллиард теңгесі өңірдегі жаңа әлеуметтік бағдарламаларға бағытталады, деп хабарлайды Аltaynews.kz тілшісі.

Шығыс Қазақстан облыс әкімдігі мен «Қазцинк» арасындағы серіктестік келісім негізінде тараптар өңірдің әлеуметтік жобаларына қаржы көлемін ұлғайту жөнінде қосымша келісім жасады. Атап айтсақ, Өскеменде экологиялық қауіпсіздік жөніндегі жобаны жүзеге асыруға 40 миллион теңге жұмсалады.

Облыстық қоғамдық кеңес бастамасымен және «Қазцинктің» қаржылық қолдауымен облыс орталығында өңірлік автоматтандырылған өндірістік-экологиялық мониторинг өлшеу жүйесін құру жұмыстары аяқталады. Жүйені іске қосқан соң, тұрғындар онлайн режимде тәулігіне 72 мәрте Өскемен ауа бассейнінің ластану көрсеткіштерін біле алады.

Жаңа жүйені енгізу аяқталған, алайда қаржы болмағандықтан, атқарыл-ған жұмыстың ақысы төленбеген болатын. Енді жоба іске асырылып, ал облыс орталығындағы ауаның ластануына қатысты ақпарат көпшілікке қолжетімді болады.