Шығыс Қазақстан облысында марал өсірушілердің слетін өткізу жоспарланып отыр. Слетте тек тәжірибе алмасып қана қоймай, саланы қолдауға қатысты ұсыныстар айтылып, марал шаруашылығын қолдау бағдарламасының шарттары талқыланады, деп хабарлайды Аltaynews.kz тілшісі.
"Дәл қазір жергілікті марал өсірушілерге тек облыс әкімдігі тарапынан ғана қолдау көрсетіліп келеді. Жалғыз осы қолдаудың өзі көптеген мәселелерді шешіп берді. Облыс әкімі Бердібек Сапарбаевтың тікелей пәрменімен асыл тұқымды марал шаруашылықтарына субсидия бөлу жолға қойылды. Облыс басшысы Ауыл шаруашылығы министрлігінің алдына да марал шаруашылығын қолдау жөнінде өте көп ұсыныстар қойып жүр. Өткен жылы олардың бір де бірі өз шешімін таппағанымен, биыл министрлік тарапынан көмектесуге уәде берілді,"- дейді облыстық ауылшаруашылық басқармасының бастығы Дүйсембай Селиханов.
