Катонқарағайда мүйіз кесу науқаны аяқталуға жақын. Аудандық ауыл шаруашылығы және ветеринария бөлімінің алдын ала есебінше, биыл шамамен 2 тоннадай консервацияланған сапасы жоғары панты алу жоспарда бар, деп хабарлайды Аltaynews.kz тілшісі.
Ауданда құрылған 11 шаруашылықтың 9-ы асыл тұқымды маралдарды өсіруге бағытталған. Олардың есебінде қазір 5,5 мың басқа дейін марал мен теңбіл бұғы бар.
– Облыс Әкімінің тікелей қолдауымен кейінгі жыл-дары марал шаруашылығын субсидиялау қолға алынды. Биыл облыстық бюджеттен 31 миллион теңге қаржы бөлінді. Бұл – марал шаруашылығын дамытуға үлкен қолдау. Аталған салада жоспарланған ветеринарлық шаралар толығымен жүзеге асырылды, – дейді аудандық ауыл шаруашылығы және ветеринария бөлімінің басшысы Рақымғали Бәйгереев.
