Самар ауылдық округі мен Мәдениет үйі ұйымдастырған «Үлгілі үй» байқауының жеңімпаздары анықталды. «Таза Қазақстан» экологиялық акциясына атсалысқан жанұяларға арнайы сыйлықтар табысталды, деп хабарлайды Altainews.kz тілшісі.

Байқау Самарға 100 жыл көшесіндегі тұрғындар арасында өткізілді. Талап бойынша тұрғындар 13 сәуірден 11 мамырға дейін  ауланы таза ұстап, қоршауды жөндеп, қоқыстарды шығарып, көшет және гүл егіп, үйлердің сыртын әктеп, терезелерді бояды. Арнайы комиссия жарыс жеңімпаздарын анықтады.

– «Таза Қазақстан» экологиялық акциясына белсене атсалысып, ауылымыздың тазалығына, көркеюіне өз үлесін қосқан тұрғындарға алғысымыз шексіз. Адам – табиғаттың төл перзенті. Осы орайда тазалықты өз ауласынан, айналасынан бастап, көпке үлгі болып, байқау жеңімпазы атанған отбасыларды құттықтаймыз! – деді Самар ауылы Мәдениет үйінің директоры Дархан Рамазанұлы.

Байқаудың жеңімпаздары да дән риза. Айта кетейік, жарыс ауылда тұңғыш рет ұйымдастырылып отыр.

– Тазалық ең бірінші өзіміз үшін жасалатын жұмыс. Жылда ауламызды сәндеп, таза ұстауға тырысамыз. Себебі балаларымыз, немерелеріміз келеді. Шараның ұйымдастырушыларына алғысымыз шексіз, – дейді байқау жеңімпаздарының бірі.