Өскемен қаласында бүгін қатты аяздың салдарынан 54 автобус пен 18 маршрутты такси жұмысқа шыққан жоқ. Өскемен қаласы жолаушыларды тасымалдау басқармасы орталығының бастығы Владимир Панковтың берген деректеріне сүйенсек, бүгін 7.30-да 300 автобустың 246-ы, 91 маршрутты таксидің 73-і ғана рейске шыққан.
Суықта жүрмей қалған көліктердің ішінде тоғыз жаңа автобус бар. Мұның аяғы 42,33,55 маршруттарының сирек жүруіне әкеліп соқты. Көліктердің бұзылуының негізгі себептері – двигательдердің қатып қалуы, тежегіштердің істен шығуы.
– Мұндай жағдай жылда алғашқы аязды күндері қайталанады,– дейді Владимир Георгиевич.– Қазір орын алған олқылықтарды жоюға тырысып жатырмыз, түске таман жағдай орнына келеді деп ойлаймын.