«Үндістанның Калькутта қаласында Махатма Ганди болып киінген жүздеген оқушы шеру ұйымдастырды» деп хабарлайды жергілікті бұқаралық ақпарат құралдары.
Естеріңізге салсақ, кезінде үнді халқының ұлт-азаттық қозғалысына жетекшілік еткен Махатма Ганди 1948 жылдың 30-қаңтарында лаңкестік әрекет нәтижесінде көз жұмған болатын.
Осындай біртуар азаматын еске алу мақсатында қала көшелеріне шыққан 10 мен 16 жас аралығындағы 500-ге жуық оқушы «Түрегел!» деп ұрандатыпты. Беттерін Гандиге ұқсастыра гримдеп, үстеріне ұлттық киім киген балалар қаланың орталық көшесімен жүріп өткен-ді.
Аталмыш шара қазірдің өзінде балалардың қатысуымен өткен ең ірі бұқаралық шеру ретінде Гиннестің рекордтар кітабына енгізіліп те үлгеріпті.
