Қазақстанда тағы бір кино түсіретін алаң пайда болмақ. Қазіргі таңда Мәдениет және спорт министрлігі «Astana Film» киностудиясының экономикалық-техникалық негіздемесін жасаумен айналысуда.

Бүгін Мәжілісте «Кинематография туралы» заң жобасын таныстырған министр Арыстанбек Мұхамедиұлы «Astana Film» киностудиясын құру Президенттің тапсырмасы екенін баса айтты.

- Тіпті жер көлемі шағын ғана Венгрия, Чехия секілді елдерде бірнеше киностудия бар. Мысал үшін «Мосфильм» - қазір жеке құрылым, бюджеттен бір тиын алмаса да табысы жоғары студия болып саналады. Бұл кино қызметін қалай құру керек дегенде бізге үлгі болуы қажет, - деді ол.

Спикер «Қазақфильмнің» техникалық жағынан жабдықталуы заман талабына сай емес екенін жоққа шығармады. Заманауи кинокартиналарды жасау үшін жаңа киностудияға барлық жағдай жасалуы керек екенін айтты.