ШҚО Қоғамдық кеңесі Өскемендегі аурухананың жұмысын тексерді
Шығыс Қазақстан облыстық Қоғамдық кеңесі жанындағы Денсаулық сақтау мәселелері жөніндегі комитеттің белсенділері облыстық мамандандырылған медициналық орталықтың қызметіне мониторинг жасады. Олардың аяқ астынан тексеріс жүргізуіне өскемендіктердің арыз-шағымдары негіз болыпты, деп хабарлайды Altainews.kz тілшісі.
Қала тұрғындары әлеуметтік желілерде орталықтың жұмысына шағымданып, түнгі уақытта медициналық қызмет көрсету сапасына арызданған болатын. Нақтырақ айтсақ, КТ аппаратының істен шығуының салдарынан шұғыл түскен науқастарға тексерулерден өту мүмкіндігі болмаған.
Шығыс Қазақстан облыстық мамандандырылған медициналық орталығының бас дәрігері Шолпан Мақашеваның айтуынша, бүгінгі таңда КТ аппаратының жоқтығы аурухананың басты проблемасы болып тұр. Өйткені орталық өңірдің түкпір-түкпірінен келген халыққа шұғыл медициналық көмек көрсететін стационарлардың бірі. Ал КТ аспабының істен шыққанына екі ай болған.
Бас дәрігер жедел түскен науқастарға сапалы медициналық қызмет көрсету мақсатында алдымен облыстық онкология орталығымен келісім-шартқа отырғандарын, пациенттерді КТ-дан өту үшін сонда апарғандарын айтты. Қазір оларда да КТ аппараты сынып қалғандықтан, енді ана мен бала орталығымен келісім-шартқа отырыпты.
Қоғам белсенділерін сонымен қатар КТ аппаратының сағат 20.00-ден кейін неге істемегені де қызықтырды. Шолпан Ермекқызының сөзіне қарағанда, аспап ескі болғандықтан тәулік бойы, 24/7 режимінде жұмыс істеуге шыдамаған.
Аурухананың бас дәрігері аспапты жөндеуге қажетті 12 миллион теңгеге жуық қаражатты жергілікті меценаттар – «ТМК» акционерлік қоғамынан сұрағандарын, мәселе оң шешімін тапқанын жеткізді. Айтысына қарағанда, ары кетсе екі апта ішінде жөндеуден өткен КТ аппараты қайтадан пайдалануға беріледі.
Ескі КТ аппаратын жөндеп, жаңасын сатып алғаннан кейін ауруханада екі компьютерлік томограф болады, бұл күні-түні жедел медициналық қызметті қажет ететін пациенттер легі толастамайтын қабылдау бөлімінің жұмысына оң әсер етері сөзсіз. Өйткені, кез-келген жабдық істен шығып қалғанда оның қызметін атқаратын қосымша аппараттың болғаны артық емес.
Біз облыстық көпсалалы онкология және хирургия орталығымен хабарласып, олардағы КТ аппаратының жағдайымен танысқан едік.
Шығыс Қазақстан облыстық Қоғамдық кеңесі жанындағы Денсаулық сақтау мәселелері жөніндегі комитет өңірдегі медицина саласының қызметіне қоғамдық бақылау жасайтын, саланың ақсап жатқан тұстарын анықтап, тұрғындардың сапалы әрі толық медициналық көмек алуын қадағалайтын қоғамдық орган.
