Күн райы салқындап келе жатқанына қарамастан Катонқарағай ауданында «Таза Қазақстан» экологиялық акциясы аясындағы тазалық жұмыстары апта сайын үзбей өткізіліп келеді. «Amanat» партиясының бастамасымен қолға алынған «Таза бейсенбі» акциясына аудан орталығының өзінде ғана 70-ке жуық адам қатысты, деп хабарлайды Altainews.kz тілшісі.

Акцияның аясында Катонқарағай ауылының тұрғындары ауыл көшелерін тазалап, ағаштарды ретке келтіріп, абаттандыру жұмыстарын жүргізді. Ауыл азаматтары, мектеп пен аурухана, әкімдік қызметкерлері, белсенді жастар қолдарына тырма мен сыпыртқы алып, қоғамдық орындар мен өз мекемелерінің аумақтарын қураған ағаш жапырақтары мен тұрмыстық қалдықтардан тазартты. Аудан орталығы тұрғындары ғана емес, ауылдық округтер де қалыс қалмай, аталған акцияға өз үлестерін қосты. Әкімдік өкілдерінің айтуынша, аудан орталығының өзінде акцияға 70-ке жуық адам қатысқан.

Қоршаған ортаны сақтап, экологиялық мәдениетті әдетке айналдыруды мақсат еткен бұл шаралар әлі де жалғасын таба бермек. Бастысы, табиғатты аялау мен қоршаған ортаны қоқыссыз ұстау ең бірінші өзімізден басталатынын ұмытпайық.