ШҚО-да 11 жастағы баланың өліміне қатысты денсаулық сақтау басқармасы түсінік берді
Шартты сурет: qyzylqoga.kz
103 арнасына баланың демі тоқтап, есінен танып қалғаны туралы қоңырау 22 қазан күні сағат 12:12-де түскен.
ШҚО Денсаулық сақтау басқармасының ақпараты бойынша, жедел медициналық жәрдем бригадасы шақыртуға 6 минут ішінде жетті, деп хабарлайды Altaynews.kz тілшісі.
- Жедел медициналық жәрдем бригадасы балаға жедел тыныс алу жеткіліксіздігі деген диагноз қойып, ҚР Денсаулық сақтау министрлігінің емдеудің клиникалық хаттамаларына сәйкес шұғыл медициналық көмек уақтылы көрсетілді, - деп мәлімдеді басқарма мамандары.
Жедел жәрдем бригадасы балаға шұғыл көмек көрсеткеннен кейін ата-анасымен бірге Ана мен бала орталығына жеткізді.
- Сағат 12:47-де бала «Ауыр ағымдағы тыныс демікпесі. 3-ші дәрежелі тыныс алу жеткіліксіздігі» деген алдын ала диагнозбен Ана мен бала орталығына жеткізілді. Ол жерде оны кезекші жансақтау бригадасы қабылдау бөлмесінде күтіп алды. Тексеру кезінде баланың жағдайы өте ауыр деп бағаланды, - дейді басқармада.
Орталықтың жансақтау бригадасы интубациямен жансақтау шараларын дереу бастап кетті. Жанама жүрек массажы жасалып, өкпені жасанды желдету аппаратына қосылды, дәрі-дәрмекпен ем-дом жүргізілді. Алайда қабылданған шаралар оң нәтиже бермеген. Сағат 14:05-те науқастың биологиялық өлімі анықталған екен.
- Баланың денесін полиция қызметкерлері сот-медициналық сараптамаға жіберді. Облыстың денсаулық сақтау басқармасы ішкі талдау жүргізіп, тәуелсіз сарапшыларды тартты, - деп хабарлады ШҚО денсаулық сақтау басқармасы.
Комиссия жұмысын жалғастырып жатыр.
Оқи отырыңыз
