Көлік полициясы азаматтарды теміржолда жүріс-тұрыс ережелерін қатаң сақтауға шақырады, деп хабарлайды Altainews.kz тілшісі Polisia.kz сайтына сілтеме жасап.

Жыл сайын елімізде теміржол қауіпсіздігін елемеу салдарынан адамдар, соның ішінде балалар қаза тауып, ауыр жарақат алады.

Көлік полициясы департаменті басшысының орынбасары Оңдасын Аштаевтың айтуынша, 2025 жылдың басынан бері теміржол көлігінен жарақат алу бойынша 39 оқиға тіркелген, оның жартысынан астамы өліммен аяқталған. Қайғылы оқиғалардың ішінде кәмелетке толмағандар мен жасөспірімдер де бар.

Оның айтуынша, бөгде адамдардың теміржол нысандарында жүруі олардың өз өміріне ғана емес, жолаушылар мен теміржол қызметкерлерінің өміріне де қауіп төндіреді. Бұл әрекеттер пойыз қозғалысының қауіпсіздігіне және жүк сақтығына да кері әсер етеді.

Құқық қорғау органдары ата-аналарға арнайы үндеу жолдады: Құрметті ата-аналар! Балаларыңызға теміржол — ойын алаңы емес, өте қауіпті аймақ екенін міндетті түрде түсіндіріңіздер.

Өмір мен денсаулық қауіпсіздігін қамтамасыз ету үшін:

• Теміржолды тек арнайы белгіленген, жарықтандырылған және жабдықталған жерлерден ғана кесіп өтіңіз

• Жолдан өтер алдында пойыз, локомотив немесе вагонның жақындап келе жатқанына көз жеткізіңіз

• Станцияларда немесе пойыз жолақтарында вагон астынан өтпеңіз және автотіркемелердің үстінен аттамаңыз

• Жолды кесіп өту кезінде құлаққап пен ұялы телефон қолдануға қатаң тыйым салынады

Жеке қауіпсіздік ережелерін сақтай отырып, өз өміріңізді және жақындарыңыздың өмірін сақтайсыз.