Күршім ауданындағы халықпен кездесуде Шығыс Қазақстан облысының әкімі Нұрымбет Сақтағанов жол-көлік инфрақұрылымын жақсарту бағытындағы жұмыстарға тоқталды. Биыл ауданда 742 млн теңгеге 41 шақырымнан астам жол мен көше жөнделіп, бірқатар маңызды магистральдар мен айналма жол құрылысы жалғасады, деп хабарлайды Altainews.kz тілшісі.

Өткен жылы «Жол жылы» шеңберінде республикалық және жергілікті маңызы бар 710 шақырым жол жөнделсе, биыл кемінде 700 шақырым жолды жөндеу көзделген. Бұл қатарда Қалбатау – Майқапшағай жолын жаңғырту мен «Осинов асуы» арқылы Рахман қайнарына дейінгі жолды жөндеу, сондай-ақ «Майқапшағай» өткізу пунктін жаңарту жұмыстары бар.

Күршім ауданында өткен жылы 2 млрд теңгеге 47 шақырым жол мен көше жөнделді. Оның ішінде облыстық маңызы бар Күршім-Қалжыр – Бурабай жолының 12-27 шақырымы (794,3 млн теңгеге 15 км), аудандық маңызы бар Күршім-Қалжыр – Ақши жолының 8 шақырымы (120 млн теңге), Маралды – Үшбұлақ жолының 2 шақырымы (36,9 млн теңге), Күршім – Алғабас жолының 2 шақырымы (72,6 млн теңге) жөнделді.

1 млрд теңгеге Бірлік, Бурабай, Ақши, Қаратоғай, Үшбұлақ, Алғабас, Құйған, Күршім ауылдарындағы 20 км көше мен көпірлер қалпына келтірілді.
Осы жылы ауданда жөнделетін нысандар тізімінде Күршім-Қалжыр – Бурабай автожолы (12-27 км, 100 млн теңге), Күршім-Қалжыр – Ақсуат жолы (37-47 км, 200 млн теңге), Күршім – Алғабас жолы (0-3 км – 3 км, 110,1 млн теңге) бар. Алғабас ауылындағы 1 км көше (52,8 млн теңге), Күршім ауылындағы 6,2 км көше (279 млн теңге) жөнделуде.

Сонымен қатар Күршім ауылында айналма жол салу мәселесі ерекше бақылауда тұр. Жобаның жалпы құны – 3,5 млрд теңге, биыл республикалық бюджеттен 900 млн теңге бөлінді. Мердігер «Терезе» ЖШС қазіргі уақытта 12 шақырымның 6 шақырымына жол негізін қалау жұмыстарын жүргізіп жатыр.

Облыс әкімі Күршім ауданының әкімі Мейіржан Әлбековке 1 қыркүйекке дейін жолаушы көлігі және автомобиль жолдары басқармасымен, экономика және бюджеттік жоспарлау басқармасымен бірлесіп, айналма жол құрылысына қосымша қаржы бөлу мәселесін пысықтауды айтты.

Фото: Жібек Нұрахмет