Шығыс Қазақстан облысында 25 қазан – Республика күніне орай ауқымды мерекелік бағдарлама дайындалды. Бұл күн – еліміздің тәуелсіздігін, бірлігі мен өркендеуін бейнелейтін басты мемлекеттік мереке, деп хабарлайды Altainews.kz тілшісі.

Өңірлік коммуникациялар қызметінде өткен брифингте Өскемен қаласы мәдениет және мемлекеттік шығармашылық тапсырыс бөлімінің басшысы Ләззат Жұмашева хабарлағандай, қалада мерекеге орай мәдени және ағартушылық бағыттағы бірқатар шаралар ұйымдастырылады.

Бағдарламаның басты мақсаты – ұлттық бірлікті нығайту, мәдени дәстүрлерді сақтау және ел тәуелсіздігінің идеяларын кеңінен насихаттау.

Мерекелік алаңдар Арбатта, Қасым Қайсенов атындағы саябақта, сондай-ақ «АДК Ривер», «Император», «Maxi Mall» және «Алтай» сынды қаланың ірі сауда орталықтарында орналасады.

Maxi Mall сауда үйінде Байжігіт атындағы қазақ халық аспаптар оркестрі мен «Әлем сазы» вокалды-аспаптық ансамблі өнер көрсетеді. Сондай-ақ мұнда Шығыс Қазақстан өнер мұражайының «Бабалар рухы» атты көрмесі, драма және оперетта театрының «Рухы биік Республика» атты концерттік қойылымы өтеді.

«Алтай» сауда орталығында облыстық филармонияның «Алтай» фольклорлық-этнографиялық ансамблі «Бабалар мекені Алтай» атты мерекелік концерт ұсынады.

Арбатта қала тұрғындары мен қонақтары «Шығыс Қазақстан табиғаты» және «Күмістің сиқыры мен жарқылы» атты көрмелерді тамашалай алады. Бұл көрмелерде облыстық мұражай қорларынан алынған бірегей экспонаттар қойылады.

«Император» сауда үйінде өңір кітапханалары «Мәңгілік ел – Мәңгілік Республика» атты танымдық-мәдени акция өткізеді.

Ерекше қызығушылық тудырған жоба – «Оқырман трамвайы». Бұл – әдебиет пен мерекені ұштастырған ерекше формат. №3 трамвайда Республика күніне арналған поэтикалық оқылымдар, әдеби кездесулер және шығармашылық оқырман сағаттары ұйымдастырылады.

Республика күні жыл сайын 25 қазанда аталып өтеді, дәл осы күні Қазақстанның мемлекеттік егемендігі туралы декларация қабылданған. Бұл мереке – халықтың тарихи таңдауы мен тәуелсіздікке бастар жолының символы, ұлттық бірегейліктің маңызды нышаны.

Өскемен қаласының тұрғындары мен қонақтары ел тәуелсіздігі мен бірлігін дәріптейтін бұл мерекеге белсене қатысуға шақырылады.

Дамир Омаров
Фото: Александр Шушеньков