Шығыс Қазақстан облысында Жұмысшы мамандықтар жылына арналған жоспар аясында «Кәсіпорындармен серіктестік: дуальды оқытудың тиімді стратегиялары» тақырыбында облыстық семинар өтті. Бұл басқосу аймақта техникалық және жұмысшы кадрларды даярлау ісіндегі негізгі бағыттарды қайта пайымдауға мүмкіндік берді, деп хабарлайды Altainews.kz.

Іс-шараға ШҚО Кәсіпкерлер палатасының, облыстық білім басқармасының өкілдері, әлеуметтік серіктес кәсіпорындардың басшылары, сондай-ақ колледж директорлары мен оқу-өндірістік жұмыс жөніндегі орынбасарлары қатысты. Жиналған барлық тарапта ортақ мақсат – өндіріс талаптарына жауап беретін білікті маман даярлау ісін жетілдіру. Осы бағытта ой бөлісіп, ұсыныстарын ортаға салды.

Семинар барысында дуальды оқытуды енгізу тәжірибесі жан-жақты талданды. Қатысушылар жүйенің аймақтағы жұмысына тоқталып, оның артықшылықтарын, кездесетін қиындықтарын және даму бағыттарын қарастырды. Дуальды оқыту – теория мен тәжірибені ұштастыратын, жастарды тікелей өндіріс ортасына бейімдейтін тиімді модель. Сондықтан оның сапалы жұмыс істеуі кәсіпорындардың белсенділігіне, колледждердің икемділігіне және екі жақтың өзара сеніміне тікелей байланысты екені айтылды.

Талқылау қорытындысында бірқатар маңызды міндеттер анықталды. Атап айтқанда, колледждер мен кәсіпорындар арасындағы әріптестікті жүйелі түрде нығайту, еңбек нарығының нақты сұранысына сәйкес оқу бағдарламаларын жаңарту, студенттердің өндірістік тәжірибесінің мазмұнын күшейту ұсынылды. Сонымен қатар, жұмысшы мамандықтарының қоғамдағы беделін арттыру, техникалық бағыттарды жастарға қызықты етіп ұсыну, жасаған еңбегімен ел экономикасын алға сүйрейтін мамандарды ынталандыру мәселелері де назардан тыс қалмады.

Бұл семинар дуальды оқытуды бірлесіп дамытудың жаңа кезеңіне жол ашты. Білім беру ұйымдары мен кәсіпорындар арасындағы серіктестік күшейген сайын, аймақтағы өндіріс орындарына қажетті білікті кадрлар даярлаудың сапасы да арта түспек.