Төрт субұрқағы бар саябақ алаңы салынады – Өскемен
![](/kz/uploads/posts/2023-06/3.webp)
Фото: Didar ақпарат
Өскеменде жаңа жағалау құрылысы жалғасып жатыр.
Қала әкімі Жақсылық Омар жаңа жағалаудың құрылысына барып, жұмыс барысы мен сапасын қадағалап қайтты, деп хабарлайды Altaynews.kz сайты Didar ақпаратқа сілтеме жасап.
Қазіргі уақытта Абай мен Шәкәрім даңғылдарын жалғайтын жол дайын екен. Көп ұзамай мердігер көпір астындағы жолдың құрылысын бастайды.
Сондай-ақ жағалау сызығы тастармен нығайтылып, жаңа жағалаудың құрылысы жүріп жатыр.
Мердігерлердің айтуынша, мұнда төрт субұрқағы бар саябақ алаңы салынады: олардың үшеуі – каскадты болса, біреуі – Арбаттағы сияқты балаларға арналған құрғақ субұрқақ. Балалар үшін экостильдегі алаң және ойнайтын алаң, спорт алаңы, фудкорт пен сәндік аркалар салынады.
Демалыс саябағының дәл ортасында сұр граниттен жасалған Үлбіге қарай түсетін баспалдақ болады. Сонымен қатар қайықшыларға арналған понтон жасайды. Жақын маңдағы үйлердің тұрғындары үшін иттерін серуендетуге арналған алаң ұйымдастыру көзделіп отыр.
Жағалауда 600 түп ағаш отырғызылып, сәндік көшеттерден аркалар орнатылатындығы айтылды. Атқарылатын жұмыстар ауқымды, сондықтан жаңа жағалаудың ашылуы күз айларына жоспарланып отыр.