Өскеменде Жаңа жыл мерекесіне дайындық жүріп жатыр. Қала іші безендіріліп, мерекелік шаралар легі де бастау алды. 

Қаланың бас шыршасы Республика алаңында орнатылып, бүгін салтанатты түрде шамы жағылды, деп хабарлайды Altaynews.kz тілшісі. 

Бас шыршаның биіктігі – 20 метр. Алаңның маңындағы ағаштар безендіріліп, мерекелік инсталляциялар да орнатылды. 

Бас шыршадан бөлек, Комендантка арнасы мен Нұрмағамбетов атындағы саябақта тағы екі ірі локация жасалады екен. Мұнда интерактивті шыршалар мен иллюминация орнатылмақ. Сәтпаев және Есенберлин даңғылдарының қиылысы тағы бір интерактивті шыршамен безендіріледі. 

Сондай-ақ жаңа жылдық инсталляциялар Арбатта, Спорт сарайының маңында, Металлургтер мәдениет сарайының алдында, Металлург саябағының кіреберісінде, Өскемен аллеясында пайда болады. Сондай-ақ Қазақстан көшесінің бойына және Спорт сарайы мен Ушанов алаңының арасындағы аллеяға да мерекелік иллюминация орнатылады.