Өскеменде қыстың қызығы енді басталды. Каникулға шыққан балақайлар үйде қамалып отыра бермей бір уақ сыртта сырғанақ теуіп, қарға аунап қызыққа батып жүр. Қандай керемет!

Осы қыста облыс орталығының Комсомол аралы, Комендантка, Этнопарк сияқты бірнеше ауданында және “Алтай” стадионында көпшілікке арнап мұз айдыны құйылып, сырғанақ жасалды, деп хабарлайды Altaynews.kz тілшісі.

Өскемен басшылығы жылдағы дәстүрден жаңылмай биыл да қала тұрғындары мен қонақтары үшін қысқы демалысты ұйымдастыруға ерекше көңіл бөліп отыр. Әсіресе балалардың бос уақытты тиімді өткізуіне барынша жағдай туғызған. Комендантка аумағында кісі қарасы мол бүгін. Бірі шана сүйретсе, енді бірі конькимен сырғанайды, анау бір шетте қарға аунап, үсті-басы су болған балалар жүр…

“Бүгін қар жауып, қаламыз тазарып қалды. Қызым мен ұлымды сырғанаққа әкелдім. Мына жердегі “45 аптека” ауданында тұрамыз. Жақын ғой, сосын келдік. Балалар каникулда. Төрт қабырғаға қарап, қамалып отырғанша далада ойнап, шыныққандары жақсы”, - дейді қала тұрғыны Бақытжамал Сағындыққызы.

Коменданткадағы мұз айдынының шетінде коньки мен шананы жалға беретін дүңгіршек жұмыс істеп тұр. Ішке кіре алмадық, иін тірескен жұрт маңайлатар емес. Кезек күтіп, керекті затын алып жатыр, кедергі келтірмедік.

Бір байқағанымыз, қазіргі балалар қанша жерден қалтафоншыл болса да сырғанақтың не екенін ұмытпапты әйтеу. Оған да шүкір.