Астана әуежайы ауа райының қолайсыздығына байланысты бірқатар рейстердің кешігуі және тоқтатылуы мүмкін екенін хабарлады. 
Қатты желдің салдарынан Астана әуежайы 72 рейстің 15-ін тоқтатты. Сондай-ақ, рейстердің бір бөлігі кешіктіріліп жатыр деп хабарлайды Altainews.kz тілшісі Астана аэропортының баспасөз қызметіне сілтеме жасап.

Елордалық әуежайдың баспасөз қызметі хабарлағандай, әуеайлақ аумағындағы желдің жылдамдығы  19 м/с , кей жерлерде 23 м/с жетеді.

Жолаушыларға рейстерінің мәртебесі және кестедегі ықтимал өзгерістер туралы өзекті ақпарат алу үшін авиакомпаниялармен байланысуға кеңес беріледі. Бұл орайда әуеайлақта қардан тазалау жұмыстары үздіксіз жүріп жатыр, осы мақсатқа 23 арнайы техника жұмылдырылды.

Рейстер туралы ақпаратты Астана халықаралық әуежайының ресми сайтынан немесе 8 (7172) 702 999 телефоны арқылы алуға болады.