Өскемен қаласындағы ауа сапасын бақылау нәтижелері қолданыстағы мониторинг пункттері экологиялық жағдайдың толық картинасын көрсетпейтінін және өзгерістер динамикасын бақылауға мүмкіндік бермейтінін көрсетті, деп хабарлайды Altainews.kz тілшісі.

Бұл мәселенің негізгі себебі – орталықтандырылған деректер базасының жоқтығы. Қазіргі таңда ауаның жай-күйі туралы ақпарат шашыраңқы күйде, бұл деректерді талдауды және тиімді шешімдер қабылдауды қиындатады. Облыс әкімдігінде өткен жиналыста «Өскемен тынысы» экологиялық бюросының өкілдері мониторинг жүйесін жетілдіру, халықпен өзара әрекетті жақсарту және шығарындыларды азайтуға бағытталған жаңа технологияларды енгізу қажеттігін айтты.

Жиналыс барысында әкімшілік айыппұлдардан түскен 3,9 миллиард теңге көлеміндегі қаражат есебінен толыққанды мониторинг және бағалау жүйесін құру мүмкіндігі талқыланды. Бұл жүйе экологиялық ахуалдағы өзгерістерді жыл бойы бақылауға мүмкіндік беріп, ластану көздерін нақты анықтауға көмектеседі. Ластанудың негізгі себептерін, яғни өнеркәсіптік кәсіпорындар, автокөліктер, жеке сектор немесе қоқыс полигондары секілді факторларды айқындау маңызды. Сонымен қатар, бұл жүйе ластану көздері болуы мүмкін жаңа нысандардың құрылысын шектеуге мүмкіндік береді.

Экологтар айыппұлдан түскен қаражатты тиімді пайдалануға басымдық беру қажеттігін айтты, себебі бұған дейін бұл қаражат тиімсіз жұмсалған жағдайлар болған.

«Өскемен тынысы» бюросының басшысы Елена Березинская-Абилова экологиялық мәселелерді шешуде мамандар мен мемлекеттік органдардың өкілдерімен бірлесіп жұмыс істеп жатқанын айтты. Экологтар халықты экологиялық жобаларға белсенді түрде тартуға мүдделі. Сонымен қатар, бюро кәсіпкерлер мен қоғам белсенділерінің бастамаларына қолдау көрсетуге дайын екенін жеткізді.

Бюро жанынан арнайы жобалық кеңсе құрылмақ. Бұл кеңсе экологиялық мәселелерді жүйелі түрде шешуге және жаңа технологияларды жылдам енгізуге мүмкіндік береді.

ШҚО әкімі Ермек Көшербаев экологиялық мониторинг жүргізу үшін басымдық берілетін аумақтарды анықтап, қоршаған орта жағдайын бақылау пункттерін құру мәселесін қарауды тапсырды. Сонымен қатар, халықаралық тәжірибені зерттеп, үздік үлгілерді қолдану арқылы нақты ұсыныстар әзірлеу қажеттігін атап өтті.

Алдағы уақытта экологиялық бюро отырыстарында қоғамдық көліктерді электрлендіру, электробустарды енгізу және электр көліктеріне көшу процесін ынталандыру мәселелері талқыланатын болады. Қолайлы жағдайлар жасау, мысалы, зарядтау станцияларын қолжетімді ету және инфрақұрылымды дамыту – халықтың экологиялық таза көлікке көшуін жеделдетеді. Сондай-ақ, зарядтау станцияларын тек қалаларда ғана емес, туристік бағыттар бойында да орнату жоспарлануда.

Фото: Махаббат Ахметжанова