Қазақстанның ұлттық құрама командасы 9-13 қыркүйек аралығында Данияның Хернинг қаласында өткен кәсіби шеберліктің IX Еуропалық чемпионаты – EuroSkills Herning 2025 сайысында 7 бірдей «Үздік медальонын» жеңіп алып, тарихи рекорд орнатты. Жүлдегерлер қатарында Өскемен жоғары политехникалық колледжінің студенті де бар, деп хабарлайды Altainews.kz тілшісі ҚР Оқу-ағарту министрлігінің баспасөз қызметіне сілтеме жасап.
Чемпионатқа Еуропаның 32 елінен 25 жасқа дейінгі 597 үздік жас маман қатысты. Қазақстандық колледж студенттері веб-технологиялар мен инженерлік графикадан бастап мейрамхана сервисі және дәнекерлеу технологияларына дейінгі 25 құзырет бойынша бақ сынады.
Жүлдегерлер:
Веб-технологиялар – Мұхаметжан Ағыбай (Астана, ASTANA POLYTECHNIC), «Best of Nation» атағына ие болып, Қазақстанның үздік қатысушысы атанды;
Мехатроника (топтық жұмыс) – Артем Мочинский (ШҚО, Өскемен жоғары политехникалық колледжі) және Данил Турапин (Астана, Жоғары политехникалық колледж);
Графикалық дизайн – Бағыжан Қойшыбаев (Ақтөбе, Жоғары политехникалық колледж);
Желілік және жүйелік әкімшілендіру (топтық жұмыс) – Данил Лапенко (Астана, Жоғары политехникалық колледждің түлегі) және Глеб Сауленко (Қостанай облысы, Автомобиль көлігі колледжінің түлегі);
Инженерлік дизайн CAD – Бақдаулет Қуаныш (Атырау облысы, С. Мұқашев атындағы жоғары политехникалық колледж).

EuroSkills – WorldSkills қозғалысы аясындағы жастар арасындағы ең ірі еуропалық кәсіби сайыс. Бұл чемпионаттың басты мақсаты – кадрларды даярлаудағы заманауи стандарттар мен жетістіктерді көрсету. Айта кетейік, 2023 жылы Қазақстан бар болғаны екі ғана медальон иеленген болса, биылғы нәтиже нағыз тарихи серпіліс болды.

Дамир Омаров
Фото: ҚР Оқу-ағарту министрлігі