Үкімет отырысында Мемлекет басшысының 2025 жылдың 8 қыркүйектегі Жолдауын жүзеге асыруға арналған жалпұлттық іс-шаралар жоспары талқыланып, жол қозғалысы мен жаяу жүргіншілер қауіпсіздігі мәселесі күн тәртібіне шығарылды, деп хабарлайды Altainews.kz тілшісі.

Ішкі істер вице-министрі Игорь Лепеханың айтуынша, жыл сайын елімізде жол-көлік оқиғаларынан 2 мыңнан астам адам қаза тауып, 20 мыңнан астам азамат жарақат алады.

Вице-министр апаттардың 90 пайызы жүргізушілердің кінәсінен болатынын атап өтті.

Сонымен қатар жүргізушілерді даярлау сапасына қатысты да сын айтты.

Тағы бір өзекті мәселе – жол инфрақұрылымының жай-күйі. Қазір республикалық маңызы бар жолдардың тек 12 пайызы ғана қауіпсіздік талаптарына сай келеді. Статистика көрсеткендей, жолдар қайта жаңғыртылғаннан кейін апаттар мен өлім-жітім бірнеше есеге азаяды.
85 пайыз жол апаты елді мекендерде орын алады. Оның төрттен бірі – жаяу жүргіншілерді қағып кету жағдайлары.

Оның айтуынша, көлік паркінің тозуы да қауіпсіздікке кері әсер етуде. Қазақстандағы көліктердің жартысынан астамы 20 жылдан ескі.

Мемлекет басшысы Қасым-Жомарт Тоқаев та биылғы қаңтар-қыркүйек аралығында елімізде 22 мыңнан астам жол апаты тіркелгенін атап өткен болатын.

Премьер-Министр Олжас Бектенов жол қауіпсіздігін ел азаматтарының өмірі мен денсаулығына тікелей әсер ететін басты мәселе деп атап, тиісті тапсырмалар берді.

Атап айтқанда, Премьер-министр Көлік министрлігіне және әкімдіктерге жол салу, жөндеу, күтіп-ұстау кезінде қауіпсіздік шараларын күшейтуді, Цифрландыру министрлігіне жолдарды мобильді байланыспен қамтамасыз ету қарқынын арттыруды, ал өңір әкімдіктеріне елді мекендерде көлік ережесін бұзуды тіркейтін камералар санын көбейтуді тапсырды.

Марат Усманов,

Астанадағы меншікті тілші

Фото/видео автордан