Бүгін Риддер қаласындағы «Эдельвейс» демалыс орталығында 2023-2024 жылғы қысқы туристік маусымның ресми ашылуы өтті.

Бағдарламада тау шаңғысынан жарыстар, қалалық хоккей командаларының көрсетілімі және мәдени ойын-сауық кеші болды, деп хабарлайды Altaynews.kz тілшісі. 

Маусымның ашылу салтанатында қонақтар спорттық ойын-сауықтан өзге аниматорлармен бірге қызықты ойын түрінде жарыстарға да қатысты. Ал мәдениет сарайының шығармашылық ұжымдары мен өнерпаздарының концерттік бағдарламасы қыстың қытымыр аязында мерекелік көңіл-күй сыйлады.

Сондай-ақ сауда алаңында қала кәсіпкерлері қонақтарға тегін ыстық шай мен басқа да дәмді тағамдар ұсынып, жылынуға мүмкіндік берді.

Айта кетейік, Риддер қаласының маңындағы тау беткейлері басқа қалалар мен облыстардан келетін туристер арасында өте танымал. Мұнда дайындық деңгейі әртүрлі адамдар үшін шаңғымен де, сноубордпен және экстремалды спортпен де айналысуға мүмкіндік бар.