KZ
Өскемен
+18°
ясно жел 1,2 м/с, ОШ
475.03 517.21 5.44

ШҚО әкімі: Ерте қамданғанның арқасында алғашқы толқынға төтеп бердік

15.04.2024, 19:30 2 596 Нұржан Кенжеұлы

Шығыс Қазақстан облысы су тасқыны кезеңінің бірінші толқынын ойдағыдай еңсерді. Қазір өңірдегі барлық құзырлы мекеме тасқынның екінші толқынына дайындықтарын пысықтауда.
Бұл туралы бүгін облыс әкімдігінде өткен алқалы жиында аймақ басшысы Ермек Көшербаев мәлім етті, деп хабарлайды Altainews.kz тілшісі. 
Бұл жиынға Астанадан арнайы келген жұмыс тобының мүшелері қатысты. Құрамында сегіз министрліктің өкілдері бар жұмыс тобының мақсаты – облысымыздағы су тасқынына қатысты жағдайды тексеру. Бүгінгі жиында бірқатар мекеме басшысының баяндамасын тыңдаған астаналық делегация ертең су басу қаупі сейілмеген бірқатар ауданды аралап, тасқынға тосқын боларлық жұмыстарды көріп қайтпақ.
Облыс әкімінің орынбасары Бақытжан Байахметов мәлім еткендей, таулы аймақтардағы қар жамылғысының еруіне байланысты су тасқыны кезеңінің екінші толқыны басталды.

– Қазір су тасқыны қаупі облыстың солтүстік, солтүстік-шығыс және шығыс аудандарында сақталуда. Олардың қатарында Риддер қаласы, Алтай, Самар, Марқакөл, Глубокое, Катонқарағай, Күршім және Шемонаиха аудандары бар. Айта кету керек, наурыз айының соңында қардағы судың мөлшері нормадан 1,5-2 есе жоғары болды. Бұл – соңғы 50 жылдағы рекордтық көрсеткіш. Облыстың шамамен 48 пайызында әлі қар жатыр, – деп мәлім етті облыс әкімінің орынбасары.

Белгілі болғандай, облыстың төрт ауданындағы өзендердің 17 учаскесінде 376 миллион теңгеге профилактикалық мұз жару жұмыстары жүргізілген. Осының арқасында сеңнің жүруі қауіпсіз өтті. Өзендердің барлығы дер кезінде мұздан аршылып, тазартылды. Осы ретте, өзендердегі су шығыны 2023 жылдың сәйкес кезеңіндегі көрсеткіштен 2,5-3 есе жоғары болғанын айту керек.
Сонымен қатар ауа райының қолайсыздығына байланысты облыстың 11 өңірінде (Өскемен, Риддер қалалары, Алтай, Үлкен Нарын, Марқакөл, Самар, Зайсан, Катонқарағай, Күршім, Ұлан, Тарбағатай аудандары) су тасқыны оқиғалары тіркелген. Алайда жедел атқарылған алдын алу жұмыстарының арқасында апатқа жол берілмеді.

– Облыста су тасқыны жағдайын уақтылы бағалау үшін тұрақты негізде аэровизуалды тексерулер жүргізіледі. 510 шақырым каналдар мен арықтарды, 277 көпірді, 1 825 су өткізу құбырын тазарту бойынша жоспарланған жұмыстар толық жүргізілді, судың кедергісіз өтуі қамтамасыз етілді. Бүгінгі дейін 370 мың текше метр қар шығарылды. Жеті мыңнан астам қапшық төселіп, 10 мың текше метр су сорылды. Жалпы, жазғы кезеңде Жол картасы бойынша 21 іс-шара, инженерлік жұмыстарға қатысты 27 іс-шара ұйымдастырылды, – деді Б.Байахметов.

Оның айтуынша, облыста жедел штаб жұмыс істейді, барлық қызметтердің жұмысы үйлестірілген. Тәулік бойы кезекшілік ұйымдастырылған.

– Жалпы, Шығыстағы су тасқынына қатысты жағдай тұрақты. Оған ертең аудандарға шыққан соң өздеріңіз де куә боласыздар. Алайда бұл арқаны кеңге салу емес. Бұл су тасқынына күні бұрын дайындалып, алдын алу жұмыстарын жүргізудің нәтижесі. Соның арқасында қауіпті кезеңнің бірінші толқынын барынша аз шығынмен өткердік. Мұның артында зор еңбек жатыр, – деген аймақ басшысы Ермек Көшербаев Шығыс Қазақстан облысы қиындыққа тап болған еліміздің өзге өңірлеріне қол ұшын созуға даяр екенін жеткізді.


Біздің Instagram парақшамызға жазылыңыз

Жаңалықтарды ең бірінші болып оқыңыз

жазылу
Кликните на изображение чтобы обновить код, если он неразборчив