Еліміздегі Электронды үкімет платформасы жасанды интеллект элементтерімен жаңартылмақ. Бұл тапсырманы премьер-министр Олжас Бектенов  цифрландыру министрлігіне жүктеді, деп хабарлайды Altainews.kz тілшісі.

2020 жылдан бері мемлекеттік қызметтерді оңтайландыру және бюрократияны азайту жұмыстары жүргізіліп келеді. Соның нәтижесінде электронды үкімет азаматтарға проактивті түрде қызмет көрсететін деңгейге жетті, енді көптеген қызметтерді алу үшін ешқайда барудың қажеті жоқ.

Мысал ретінде Олжас Бектенов жаңа туған нәрестеге ЖСН тағайындау процесін келтірді.

Мемлекет пен екінші деңгейлі банктер арасындағы әріптестіктің арқасында азаматтардың онлайн қызметтерді қолдану деңгейі артып келеді.

Цифрландыру министрлігіне жүктелген міндеттер – интернетпен қамту жобаларын уақытылы жүзеге асыру, шалғай елді мекендерді интернетпен қамтамасыз ету және ауылдық пошта бөлімшелерінде мемлекеттік қызметтерді қаржыландыру мәселесін шешу.
Сондай-ақ мемлекеттік органдармен бірлесе отырып, жыл соңына дейін Халыққа қызмет көрсету орталықтарында ең көп сұранысқа ие қызметтерді толық электрондық форматқа көшіру.

Бұл қадамдар азаматтардың мемлекеттік қызметтерге қолжетімділігін жеңілдетіп, бюрократияны қысқартуға мүмкіндік береді.