Мемлекет басшысы IV Ұлттық құрылтай отырысында көтерілген бастамаларды іске асыру жоспарын бекітті. Құжатта елдің гуманитарлық және әлеуметтік-экономикалық дамуына бағытталған 53 тармақ қамтылған, деп хабарлайды Altainews.kz тілшісі.
Жоспар аясында «Қазақстан балалары» бағдарламасы іске қосылып, 1300 мектеп жаңғыртудан өтеді. Сонымен қатар балалар мен ересектерге арналған оңалту орталықтары салынады.
Жол құрылысына басымдық беріліп, Арқалық әуежайы жаңғыртылады. Жыл сайын 200 инвестициялық жоба іске қосылады, бұл аймақтардың экономикалық дамуын жеделдетуге ықпал етеді.
Елдің мәдени мұрасын сақтау және ілгерілету мақсатында Ұлттық цифрлық архив құрылып, театрлар мен өнер ордаларына қолдау көрсетіледі. Сондай-ақ шетелде Абай институттары ашылады, бұл қазақ мәдениеті мен әдебиетін халықаралық деңгейде дәріптеуге мүмкіндік береді.
Мемлекеттік саясат шеңберінде шекара маңындағы аймақтардың дамуы, ғылыми қалашықтарды қолдау, ерекше қажеттіліктері бар балаларға көмек көрсету мәселелері қарастырылған.
Бұл жоспар – елдің ұзақ мерзімді дамуына арналған маңызды бағдар. Ол әлеуметтік, экономикалық және мәдени салаларды нығайтуға бағытталған жүйелі шараларды қамтиды.