Өрт сөндіру көлігіне жол беріңіз
Өскеменде қалалық полиция басқармасының қызметкерлері мен ШҚО ТЖД құтқарушылары арнайы профилактикалық рейдтер жүргізді. Өздеріңіз білетіндей, төтенше жағдайда әр секунд санаулы, аздаған кідіріс адам өміріне тұрарлық болуы мүмкін. Алайда, өрт сөндіру көлігі сиренасының дыбысын естіген кезде жол бермейтін жүргізушілер де аз емес, деп хабарлайды Altainews.kz тілшісі.
Сонымен қатар Қазақстан Республикасы өрт сөндіру ережесінің 164-ші тармағына сәйкес «Ғимараттарға, құрылыстарға, ашық қоймаларға және сыртқы өрт сатыларына және өртке қарсы сумен жабдықтау көздеріне жолдар, өтпелер мен кіреберістер жарамды күйде ұсталуға және өрт техникасының өтуі үшін қолжетімді болуға тиіс», – деді ШҚО ТЖД бастығының міндетін уақытша атқарушы Қуатбек Кенжебекұлы.
Полиция қызметкерлері өрт сөндіру автокөлігінің кабинасына бірге отырып, жүргізушілердің өрт сөндіру көлігін қалай өткізетінін тексерді, өткізілген іс-шаралар нәтижесінде бір құқық бұзушы Әкімшілік құқық бұзушылық туралы кодекстің 598-ші бабы бойынша әкімшілік жауапкершілікке тартылды. Өскемен қаласы полиция басқармасы қызметкерлерінің деректері бойынша жыл басынан бері жоғарыда аталған құқық бұзушылық бойынша 8 жүргізуші, облыс бойынша 12 жүргізуші жауапкершілікке тартылған.
ШҚО ТЖД автокөлік жүргізушілерді мына ережелерді сақтауға шақырады: тұрақ үшін орын таңдағанда арнайы техниканың кіру орындарын бос қалдыруды ұмытпаңыз, көрсетілген арнайы сигналдары бар көлік құралы жақындаған кезде жүргізушілер кедергісіз өткізуге, жол беруге міндетті.
ШҚО ТЖД баспасөз қызметі
