ШҚО-да мал басын көбейту бойынша оң өзгерістер байқалуда
Шығыс Қазақстанда ауыл шаруашылығының жалпы өнімін екі есе ұлғайту жөнінде Мемлекет басшысының тапсырмасын орындау үшін 2024-2028 жылдарға арналған Жол картасы белсенді іске асырылуда. Бұл туралы облыстық әкімдікте өткен жиында ШҚО Ауыл шаруашылығы басқармасының басшысының міндетін атқарушы Диляра Жылқайдарова мәлімдеді, деп хабарлайды Altainews.kz тілшісі.
2024 жылдың 10 айының қорытындысы бойынша ШҚО-да жоспарланған 20 көрсеткіштің 8-і орындалды, ал 12-сі жүзеге асыру сатысында.
Дегенмен, кейбір бағыттарда әлі де жұмыс істеу қажет. Мысалы, қарақұмық пен картоп сияқты дақылдардың егіс алқаптары бойынша жұмысты күшейту қажет. Машина-трактор паркінің жаңарту қарқыны баяу, ал ескірген техниканы есептен шығару жеткіліксіз. Сондай-ақ су үнемдеу технологиялары да барлық ауданда енгізілген жоқ, дегенмен 1000 гектардан астам жерді қамтыған бірнеше жоба жүзеге асырылуда.
Сүт өндірісін дамыту стратегиялық маңызды бағыттардың бірі болып отыр. 2024 жылы алты сүт-тауарлы ферманы құруға несие берілген. Алайда ұйымдастырушылық және қаржылық қиындықтарға байланысты кейбір жобалар 2025 жылға ауыстырылған.
Сонымен қатар асыл тұқымды ірі қара малды импорттау жоспарының орындалмау қаупі жоғары. 2024 жылдың қарашасындағы жағдай бойынша жоспарланған 1800 бастың бірде-бірі сатып алынған жоқ. Алтай (жоспар – 1300 бас), Ұлан (286 бас) және Шемонаиха (214 бас) аудандарындағы ауыл шаруашылығы кәсіпорындары Ресей Федерациясына енгізілген санкциялардан кейін тасымалдау құнының қымбаттауына байланысты Еуропадан мал сатып ала алмады. Алтай ауданындағы «Средигорное-2» ЖШС 350 басты Германиядан 2025 жылдың қаңтарында ғана жеткізуді күтуде, себебі блютанг ауруына байланысты ірі қара малды экспорттауға тыйым салынған.
Агроөнеркәсіптік кешенді дамытудағы маңызды құралдардың бірі – инвестиция тарту. Алайда бұл бағыттағы жоспар да толық орындалмаған.
Облыс әкімінің бірінші орынбасары Нұрымбет Сақтағанов басқарма басшылығына және тиісті қызметтерге аудан әкімдерімен бірлесе отырып, Жол картасының қалған көрсеткіштерін орындау бойынша жұмыстар жүргізуді және туындаған мәселелерді шешу жолдарын табуды тапсырды.
