Ұлан ауданының ауылдық елді мекендерінде соңғы жылдары инфрақұрылымды дамыту мен тұрғындардың өмір сүру сапасын жақсарту үшін бірқатар маңызды жұмыстар атқарылуда. Бұл жұмыстардың ішінде көше жарығы, спорт алаңдарын орнату, сондай-ақ су тасқынынан қорғау шаралары ерекше орын алады, деп хабарлайды  Altainews.kz  тілшісі.

«Ауыл – Ел бесігі» жобасы аясында төрт ауылда көше жарығы орнатылды. Тарғын, Бозанбай, Таврия және Мамай батыр ауылдарында 40,2 миллион теңге көлемінде 285 жарық бағанасы мен жарықтандыру құралдары орнатылды. Жұмыстар толық аяқталды, ауыл тұрғындары осы игіліктерді толыққанды пайдалану мүмкіндігіне ие болды.

Бозанбай мен Таврия ауылдарында 100,9 миллион теңгеге екі мал қорымы құрылысы басталды, бұл ауыл шаруашылығы саласын дамытуға және экологиялық қауіпсіздікті қамтамасыз етуге бағытталған маңызды қадам.

Аудандағы су тасқынына қарсы шаралар да назардан тыс қалған жоқ. 13,7 миллион теңге бөлініп, 7 ауылда, соның ішінде Казачье, Герасимовка, Айыртау, Отрадное, Мамай батыр, Ново-Одесское және Таврия ауылдарында су тасқынының алдын алу жұмыстарын жүргізу мақсатында арнайы шаралар атқарылды. Қасым Кайсенов ауылында 751 метрлік дренаждық каналды салуға 13,5 миллион теңге бөлінді. Бұл канал ауылды су тасқынынан қорғау және ауыл шаруашылығы жерлерін суару үшін маңызды рөл атқаратын болады.

Ұлан ауданында атқарылған жұмыстар ауданның әлеуметтік инфрақұрылымын жақсартуға және тұрғындардың өмір сүру сапасын арттыруға бағытталған ауқымды жобаларды қамтиды. Әрбір ауылда жүзеге асырылып жатқан бұл шаралар тұрғындарға қолайлы жағдай жасауға және ауылдық жерлердің дамуына септігін тигізуде. Қорытындылай келе, бұл жобалардың жүзеге асырылуы ауданның жалпы даму деңгейін көтеріп, халықтың әлеуметтік әл-ауқатын арттыруға бағытталған маңызды қадам болып табылады.

Ержан Әбіш