Тәуелсіздік – ұлттың ең ұлы құндылығы. Бұл қасиетті мереке қарсаңында шығысқазақстандықтар Тәуелсіздік күніне арналған челленджге қатысуда. Акцияға өңірдің мектеп оқушылары, әскери қызметшілері және құтқарушылары белсенді түрде атсалысып жатыр, - деп хабарлайды Altainews.kz тілшісі.

Челлендж барысында қатысушылар әлеуметтік желіде посттар жариялап, Тәуелсіздіктің маңызы туралы ойларын бөлісуде. Олардың әрқайсысы егемендікке жетудің қиын да маңызды жолын атап өтіп, Отанға деген сүйіспеншіліктерін білдіруде.

Шараға ШҚО Төтенше жағдайлар департаментінің құтқарушылары мен әскери қызметшілері де қосылды. Олар өз сөздерінде Тәуелсіздікті қорғаудың және мемлекеттің тұрақты дамуын қамтамасыз етудің маңыздылығын ерекше атап өтті.

Бұл челлендж – еліміздің болашағы саналатын жастарды, әрбір азаматты ортақ мақсатқа біріктіретін игі бастама. Тәуелсіздікке арналған іс-шаралар халықтың рухын көтеріп, патриоттық сезімін арттыруға үлес қосуда.